Mejalaran saking ngempel toya ring tukad Krana kamargiang toyane nuut jelinjing tepin bongkol bukit Tukad Mecanggah (mecarang) ngelintangin belahan pilah batu paras sane kawastanin ring Meringang, majalaran saking paswecan dane I GUSTI MANTU NGURAH SILIT MATEGIL saking Geria Sibetan, mapinunas ring Ida Betara sane melinggih ring Pura Pucak Gading Watu Macepak (Pura Jati) anglarakan adnyana japa Mantra Sidi Mandi, Sidi Wakia mawastu mersidayang dados Jelinjing kawastanin Jelinjing Cupit utawi Patuk Bayune, ka sanggra raris ring ikrama sane ngempel toya, raris kemargiang nuut Jelinjing sane kawastanin ring aane pahpaha toyane kabilukang kangin nuut tepin bongkol bukit tanah kah, mawates tanggu kelod irika malih kapatok kalikukang kangin kawastanin ring Patuke nuut tepin bongkol bukit tanah toya macepol ngeraris rauh ring tepin bongkol bukit tanah Songis.
Wus betel pemargin toya jelinjing punike embas raris panganikan dane I GUSTI MANTU NGURAH SILIT MATEGIL mantuke ring krama seka ngempel toya, buin pidan di subane nyidayang mula padi ditu di bukit umah sanghyange bangunang Bedugule, to ade batu gede pindaka gelebeg lesung mepelancah senggah, yan manyerit munyin senggahe mak cine gumi ke gerebehan utawi kemeranaan, yan mamunyi lesunge kadingehang anak nebuk maka ciri padine puyung, buin abesikne piteket tiange teken para krama seka ajak mekejang disubane makinkin padine manyi ikrama seka ngamputin padine mebates ebah uga saking tepin cakangan nuut selantang jelinjing tanah kah ngantos ke Songis. Aturang raris ring Ida Betara sane malinggih ring Pura Pucak Gading Watu Macepak (Pura Jati). Nah aketo nyen pamunyin tiange anggon paingetan ajak makejang, kasuwen - suwen raris ngalinggihang bedugul linggih nyane ring bukite duur patuke, ring umah sanghyange, ring Jepune jelinjing tengah, ring Sempanane, ring Tukade.
Kasuwen – suwen malih sapenyeneng pengelingsir Subak dane almarhun I Nyoman Bendesa, I Wayan Gejer, I Wayan Lanus, I Wayan Sedahan Keweh, I Wayan Date, I Wayan Dania, raris kasikiang Bedugule sami, raris ngewangun Pura ULUN SUWI malinggih ring Bukite duuran Patuke ngelantur ngewangun Pura Empelan di Dam Krana, pengawite majalaran palinggih Padmasana ring Tepas Gegedongan maprucut linggan Betari Gangga, Ulun Suwi Linggih Betari Gangga hyang – hyanging Segara Danu.
Daweg punika genah pesangkepan ring banjar Biaslantang nyelang, kulkul taler irike kegenahang warsa 1970 ngerincikang raris winaya pacang mekarya Bale subak, irika raris krama subak mepesuan batu pamor bubuk numbas, raris kagotong royongin mekarya. Ngelantur mecikang mekarya telabah lan cakangan keatur becik. Warsa 1970 I Nengah Berata lintang paruman kesudi dados pekaseh. Taler uningayang titiang malih sane kasudi dados prajuru subak ngantos mangkin inggih punika :
1. I Nengah Berata dados pekaseh,
2. I Wayan Subrata dados penyarikan,
3. I Nyoman Dastra dados Juru Raksa
Indik swadarma dados prejuru sampun becik, indik paiket –paiketan sampun memargi, yadnya wantah merupa paswara utawi perarem. Mejalaran antuk awig – awig sane sampun kekaryanin tur kesungkemin warsa 2006. Asapunika wicarita Subak Babakan mogi – mogi sangkaning paswecan Ida Sang Hyang Widhi pengaptin semeton subak mangda ngemangguhang kerahajengan. Om Santih, Santih, Santih Om.
Jika Sobat menyukai Artikel di blog ini, Silahkan masukan alamat email sobat pada kotak dibawah untuk berlangganan gratis via email, dengan begitu Sobat akan mendapat kiriman artikel terbaru dari Media Pendidik dan Pendidikan
